Die Diana Ferrus-prys is vernoem na die bekroonde Suid-Afrikaanse digter, skrywer en aktivis, Dr. Diana Ferrus, as ’n huldeblyk aan haar buitengewone bydrae tot die bewaring van gemeenskapsverhale, taalregte en sosiale geregtigheid deur poësie.
Uit die 200 plus digters wat regoor Suid-Afrika en Namibië ingeskryf het, stap drie van ons skrywers weg as die wenners van die Diana Ferrus-prys vanjaar:
- Gaireyah Fredericks, deelnemer aan die PEN dit neer program in 2023, as eerstepryswenner met “Swaa dra”.
- Dianne Du Toit Albertze, deelnemer aan die NATi Jong Sterre-residensie in 2019, as tweedepryswenner met “Die kjeent”.
- Yuwinn Kraukamp, deelnemer aan die Kommadagga Slypskool in 2022, as derdepryswenner met “Dood in albei tale”.
Hierdie poësiekompetisie is ’n geleentheid om die veelsydigheid van Afrikaans, asook die stories en ervarings van gewone mense, op ’n kragtige manier te vier. In die gees van inspirasie, geskiedenis en taal, word al die wenners en finaliste se inskrywings in die bundel Ons kom van hier gepubliseer – ’n huldeblyk aan gemeenskappe, herinneringe en hoop.
Ons kom van hier
Die Diana Ferrus-prys 2024
Samesteller: Zalman S. Davis
Uitgewer: Minimal Press
Hierdie bundel is ’n viering van die mense en die taal wat Afrikaans laat lééf – nie net in boeke en skole nie, maar in strate, kombuise, moskees, kerke, sitkamers en taxi’s. Ons kom van hier bring die stemme van digters uit al die uithoeke van Suid-Afrika en Namibië bymekaar: van die Karoo tot die Kaapse Vlakte, van plattelandse dorpe tot stedelike woonstelle.
Hier praat Afrikaans in drie tonge: Standaardafrikaans, Kaaps en Nama-Afrikaans. Elke gedig is ’n vingerafdruk – uniek, lewendig, deurdrenk van kultuur, geskiedenis en identiteit. Hier kry jy nie ’n eenvormige of gesuiwerde Afrikaans nie. Jy kry die Afrikaans van ons mense: rou, eerlik, mooi.
Hierdie is nie net ’n bundel poësie nie – dis ’n dokument van ons tyd. ’n Taal-argief. ’n Getuienis van ’n Afrikaans wat nie behoort aan een klas of kleur nie, maar aan almal wat sê: Ons kom van hier.
2025 is ook ’n belangrike mylpaal vir Afrikaans: presies 100 jaar nadat dit in 1925 amptelik as ’n taal van Suid-Afrika erken is. Afrikaans is gebore uit kontak, kreatiwiteit en oorlewing – en Ons kom van hier weerspieël hierdie geskiedenis deur poësie wat eg, eerlik en veelstemmig is. Die bundel is nie net ’n publikasie nie – dis ’n kulturele monument.
Hierdie indrukwekkende bundel word deur Minimal Press uitgegee en sal einde Julie 2025 landswyd in boekwinkels beskikbaar wees. Dit is tans beskikbaar vir voorafbestelling.
- Prys: R240
- Voorafbestellings: R220 tot 31 Mei 2025
- Aflewering: R70 via Paxi
- Bestelling per e-pos: Gebruik onderwerp Ons kom van hier en spesifiseer die aantal boeke.
- E-posadres: dianaferrusprys@gmail.com
Klik hier vir meer inligting oor die Diana Ferrus-prys en lys finaliste.
