Die wenners van die 2024 Woordtrofees is op 28 Oktober tydens ’n toekenningsgeleentheid by die Nooitgedacht-wynlandgoed bekroon. Die wenners het elkeen ’n oorkonde en ’n bedrag geld ontvang.
Vanjaar se Woordfees-program het feesgangers van ’n merkwaardige rits aanbiedings voorsien. Die uitvoerende kunste het met groot entoesiasme kom saamspeel – van intieme vertonings in klein ruimtes tot dreunende skares in die buitelug.
Gillian Mitchell sameroeper van die Woordtrofees-beoordelaarspaneel
Dit is met vreugde wat ons saam met Miché van Wyk feesvier wat die Woordtrofee vir Beste opkomende kunstenaar gewen het. Miché Colleen van Wyk is ’n voormalige deelnemer aan die NATi Jong Sterre-residensie. Haar toneelstuk, Suurdeeg, is tydens vanjaar se Woordfees opgevoer.
Suurdeeg
geskryf deur Miché Colleen van Wyk
In die konserwatiewe omgewing van Namakwaland probeer twee amper-skoonsusters uitpluis wat hulle doel as vroue in die lewe is. Anna, wat reeds tien jaar met Ouboet Gert getroud is, raak verlief op haar swaer se meisie, Emma, wat vir die eerste keer sonder Klein-Johnietjie op die plaas Besondersmeid is. ’n Romantiese drama waarin die karakters voor eensaamheid en ’n begeerte na liefde en betekenisvolle verhoudings te staan kom.
Benewens Miche se toekenning, vier ons ook Danie Marais wat die prys van topboekverkoper in poësie vir sy digbundel, Ek en jy bestaan nie, gewen het. Ek en jy bestaan nie is Danie Marais se vierde bundel waaraan hy gewerk het tydens sy verblyf in Paulet Huis gedurende die Brussel tot Karoo-residensie in 2023.
Ek en jy bestaan nie deur Danie Marais
Ek en jy bestaan nie is die langverwagte vierde bundel uit die pen van die bekroonde digter Danie Marais. Soos in sy vorige bundels is dit gedigte wat openhartige, intieme gesprekke met die leser aanknoop – hierdie keer oor die ongemakke van ras en klas. Dis ’n bundel oor die menslike middelklastoestand en die unbearable whiteness of being wat waag om te praat oor die dinge waaroor mense liefs stilbly in die woonbuurte van Stellenbosch waar ’n koue burgeroorlog stil in die boomryke strate woed.
Baie geluk, Miché en Danie! Mag julle voortgaan om mense aan te raak met jou kuns en woorde.
Klik hier om die volledige lys Woordtrofees-wenners van 2024 te sien.
