Is Krismis innie strate
sonne Boney M
voel die huis verlate
niks kersboom
vir osse nasate
of tong, gammon,
of hemp ironed in nate.
Maar.
Daar is Lucky Star pilchards
met rys en atappel
en skoon gordyne
Huis gespringclean
niks gift
gelabel as myne.
Daar is Lucky Star pilchards
en jellie en custard
vir poeding
Ietsie soet of
Issit versoening?
Maar daar is Lucky Star pilchards,
dis ons Kers ‘ding’.
Theolla Langenhoven (1982) werk tans by die Universiteit van Wes-Kaapland na jare in die staatsdiens. Sy wil haar skryfwerk gebruik om haar gemeenskapswerk, haar liefde vir administrasie en haar kennis van sielkunde en kriminologie te kombineer en lig te werp op die maatskaplike kwessies wat gemeenskappe in die gesig staar. Van haar kortverhale en artikels is in Kuier gepubliseer. Haar gedigte het in die Lekka Poems-bloemlesing verskyn en in 2023 het sy ’n gebedsboek vir tieners, Die Here kom sterk deur, gepubliseer. Sy beskou dit as ’n voorreg om in 2020 te kon deelneem aan die Kommadagga-slypskool vir kortverhaalskrywers. In 2023 het sy ’n AfriCAN Honoree Authors’ Award ontvang.
